ཀ་རྩོམ་ཀུན་ཕན།

ཀ་ཁ་ལྷབ་གེ་འབྲུག་པའི་ན་གཞོན་ཚུ། ། ཁ་སྐད་ཤེས་ན་མཁས་པ་འདི་ལས་གཞན། །
ག་ཏེ་འཚོལ་རུ་མི་འཐོབ་ངེས་དོན་ཨིན། ། ང་ཡང་འདི་ལུ་བརྩོན་དོ་ཆ་རོགས་སུ། །

ཅ་ལ་རྒྱུ་ནོར་དགོ་རུ་ཁ་སྐད་ཀྱིས། ། ཆ་རོགས་འབད་འདི་སྒྲུབ་པ་ཐེ་ཚོམ་མེད། །
ཇ་ཆང་ལོངས་སྤྱོད་སྤྲོ་བའི་ཟས་ཚུ་ཡང་། ། ཉ་མོ་རང་ལུ་ཁ་སྐད་འདི་གིས་གནང་། །

ཏ་ལ་ཤིང་གི་བསིལ་ཉམས་ལྡན་པའི་འོག ། ཐ་དང་དམ་ཚིག་ལྡན་པའི་བུ་མོ་དང་། །
ད་ལྟོ་ཧིང་གཏམ་བཤད་ནི་འཐོབ་མི་འདི། ། ན་ཐད་བརྟག་ན་ཁ་སྐད་འདིའི་དྲིན། །

པ་ཏྲ་གསེར་གྱིས་རྒྱན་པའི་ཁང་ཁྱིམ་ཡང་། ། ཕ་སྐད་རིན་ཆེན་གསེར་ལས་སྒྲུབ་སྒྲུབ་ཨིན། །
བ་དང་བོ་ཅུང་བསྐྱེད་པའི་སྙིང་བརྩེ་འདི། ། མ་མ་རྫོང་ཁ་འདི་གི་འབྲས་བུ་ཨིན།།

ཙ་རི་གནས་དང་་བྱིན་རླབས་འགྲན་མཚུངས་པ། ། ཚ་གྲང་གནས་སུ་འགྱོ་བའི་ལམ་མི་སྟོན། །
ཛ་ཏི་སྨན་ལས་ལྷག་པའི་བྱིན་རླབས་འདི། ། ཝ་སྐད་མེན་པ་རྫོང་ཁའི་ཁྱད་ཆོས་ཨིན། །

ཞརཝ་དང་ཉམ་ཆུ་དཀའ་ངལ་སེལ་བའི་མགོན། ། ཟ་མོ་ཤེས་རབ་སྐད་དང་ཐབས་ཀྱི་སྐད། །
འ་འུར་མེད་པ་སེམས་ཅན་ཆོས་ལ་སྐུལ། ། ཡ་རབ་ན་གཞོན་འདི་ཚུ་བརྩོན་ན་དགའ། །

ར་ལུགདུད་འགྲོ་བཟུམ་སྦེ་འཁོར་བ་ནང་། ། ལ་མོ་ལན་ཅིག་ལན་གཉིས་བརྒལ་འདི་གིས། །
ཤ་གཟུགས་ཕངས་སེམས་ཡོད་རུ་སྡུག་བསྔལ་ལས། ། ས་གཞི་ལས་ཀྱང་སྦོམ་པའི་སྡུག་བསྔལ་འདི། །
ཁ་སྐད་བདག་འཛིན་འབད་ན་འདི་ལས་སྒྲོལ། །

ཧ་ཧ་མ་དགོད་ངད་ཀྱི་གླེང་རྩོམ་ལུ། ། ཨ་མ་གཙོས་པའི་འགྲོ་དྲུག་སེམས་ཅན་ཀྱིས། །
ནོར་བ་འཛོལ་བ་ཡོད་ན་བཟོད་པར་གསོལ། ། གོང་འགལ་མེད་པར་བཞུགས་པའི་རེ་བའོ།། །།

འབྲི་མི་ བོད་སྒར་རྟ་མགྲིན་དབང་ཕྱུག

བསམ་བཀོད་ 1།

  1. ༼སྣང་བར་གང་ཤར་གྱི་འཁྲུལ་གླུ༽

    སྟེང་ལྷ་ཡུལ་འདྲ་བའི་འཛམ་གླིང་ནང་།།
    རང་དལ་འབྱོར་མི་ལུས་ཐོབ་རུང་རང་།།
    སྔོན་ཚོགས་བསགས་ཆུང་བའི་འབྲས་བུ་གིས།།
    དུས་ད་རེས་འཁྲུལ་སྣང་ལང་དགོ་པས།།

    དུས་ད་རེས་ཐོབ་པའི་ལུས་རྟེན་འདི།།
    ལུས་དྲོད་ཉམས་ལྡན་པའི་མལ་ཆ་ནང་།།
    ཨའེ་མཐོང་མི་རྨི་ལམ་ཙམ་ཅིག་ལས།།
    དུས་ཡུན་དུ་སྡོད་པའི་དབང་མིན་འདུག།

    ངེ་ལུས་རྟེན་གནམ་ཁའི་ས་སྨུག་འདྲ།།
    རྐྱེན་ངན་པ་རླུང་འཚུབ་འཕུ་བའི་ཚེ།།
    གཟུགས་དངོས་སུ་མེད་པའི་ས་སྨུག་འདི།།
    གནམ་སྟོང་པའི་སྦུག་ལུ་ཡལ་བར་ཕངས།།

    ཕ་དྲིན་ཅན་ཚེ་ལས་འདས་པའི་ཤུལ།།
    ངེ་བཀའ་དྲིན་ཅན་གྱི་ཡུམ་ཆེན་ལུ།།
    ཟས་གོས་ཀྱི་དཀའ་ངལ་འཐོན་ཆིཝ་ལས།།
    ང་གཞན་གཡོག་རྒྱུགས་པར་གཏང་ད་ཡི།།

    ང་སྐྱེས་བའི་ལོ་ཚད་ཆུང་སོངམ་ལས།།
    ཉམས་མྱོང་དང་ལྕོགས་གྲུབ་མེདཔ་ལས་བརྟེན།།
    བྱམས་སྙིང་རྗེ་མེད་པའི་སྦྱིན་བདག་གིས།།
    ཨའེ་མནོ་ཚད་དྲན་ཚེ་རྟས་ཐག་དྲང་།།

    ཨའེ་འདི་ཚུ་སེམས་ཁར་དྲན་པའི་ཚེ།།
    དུས་ད་རེས་དུས་ལུ་མེན་རུང་རང་།།
    ང་ཧེ་མའི་མནོ་བསམ་གཏངམ་ད་ལུ།།
    སེམས་འཁྲུལ་བའི་མིག་ཆུ་ལས་ཀྱི་ཤོར།།

    འབྲུག་གཞུང་དང་ཨ་མའི་བཀའ་དྲིན་ལས།།
    ཕྱིའི་ཡི་གུ་ཨེ་བི་སི་དྲི་དང་།།
    རང་འབྲུག་ཡིག་ཀ་ཁ་ག་ང་ཚུ།།
    ངོ་འཛོལ་དགོཔ་མ་འཐོན་བཀའ་དྲིན་ཆེ།།

    གཟུགས་མི་ཡི་ལུང་པར་འཁྱམས་རུང་རང་།།
    བསིལཝ་རླུང་ལས་མགྱོགས་པའི་ངེ་གི་སེམས།།
    ཉམས་དགའ་བའི་ཕ་ཡུལ་ལུང་པ་ལུ།།
    དྲིན་ཆེ་བའི་ཡུམ་ཆེན་ཨའི་དང་མཉམ།།

    སེམས་སྐྱོ་བ་མི་ཡི་ལུང་པར་ལུ།།
    ངོ་ཤེས་པ་ས་དང་གནམ་རང་མས།།
    དྲིན་ཆེ་བ་ཆུ་དང་མེ་རང་མས།།
    བུ་རང་གི་ཕ་ཡུལ་ཧིང་ལས་དྲན།།

    བྱམས་བརྩེ་གདུང་ཅན་གྱི་སྤུན་ཆ་ཚུ།།
    ཨའེ་ཤ་ཁྲག་མནོ་བའི་ཧིང་ཁར་ལུ།།
    དུས་རྟག་བུ་དྲན་ཏེ་འབད་རུང་རང་།།
    ཞལ་དངོས་སུ་མཇལ་བའི་རང་དབང་མེད།།

    དྲིན་ཆེ་བའི་ངེ་གི་ཨ་མ་དང་།།
    ཨའེ་བརྩེ་གདུང་ཅན་གྱི་སྤུན་ཆ་ཚུ།།
    དུས་ད་ལྟོ་མཇལ་བའི་དབང་མེད་རུང་།།
    ལོག་ཤུལ་ལས་མཇལ་བའི་སྨོན་ལམ་ཡོད།།

    ཀརྨ་ཀརྨ། གཞལམ་སྒང་ ཝམ་གླིང་།

    ཀརྨ་ཀརྨ། གཞལམ་སྒང། ཝམ་གླིང་བྱ་རུང་ཁ་ཤོར།

ལན་གསལ་བཀོད།

ཁྱོད་ཀྱི་གློག་འཕྲིན་ཁ་བྱང་འདི་དཔེ་སྐྲུན་འབད་འོང། དགོས་འདོད་ས་སྒོ་ཚུ་ * སྦེ་མངོན་གསལ་འབད་ནུག